Oradaladou é nome do proxecto emprendido no 2017 por Sonsoles Penadique e Carlos Quintá. Nel conflúen as inquedanzas mutuas dos dous artistas no campo da reelaboración das músicas populares de Galicia. A palabra e a voz únese ao acordeón diatónico e ao violín, co obxectivo de propoñer espectáculos próximos, sintéticos, nos que a música popular aflora lonxe de calquera estereotipo vinculado ao “revival” folqui dos anos 90. Neles, as habituais músicas baseadas no repertorio de gaita que se asocian inconscientemente co repertorio da música tradicional, son mudadas polas músicas mais mundanas, as músicas das cociñas, as ladaíñas, os arrolos, os romances de animalario, o repertorio de Florencio O cego dos Vilares…
Baixo o nome de Oradaladou, producen tanto espectáculos para crianzas e familias, no que traballan a música coma ente suprematista e a empregan para espertar sensibilidades e emocións apoiándoa con diversos recursos escénicos (monicreques e os teatrillos) así coma espectáculos puramente musicais.